Experimento científico

Facendo uso do bo traballo do amigo e compañeiro de moitas batallas “tecnopedagóxicas”(se existe tal palabra), José Fariña, propóñovos facer un experimento que se pode encadrar dentro da materia de Ciencias Naturais e Sociais. O experimento consiste en ver como se comportan os ovos téndoos sumerxidos en diferentes líquidos e en diferentes condicións. Aquí vos deixo o vídeo que elaborou coa inestimable axuda de Víctor e Martina no que se nos proporciona o material necesario e o proceso para facer o experimento.
Tamén queda á vosa disposición a ficha de seguemento do experimento para que, como nos científicos, os nosos nenos e nenas poidan tomar nota e rexistrar csda un dos pasos que se dan na realización do experimento.

Que pasaría si... non coidamos os dentes? from CPI CRUZ DO SAR on Vimeo.

Documento de seguemento do experimento

Algúns MAIOS recibidos

                                            

Aquí mostro algúns dos maios enviados polos nenos e nenas ao longo da semana pasada. Unhas verdadeiras obras de arte! Canto, e que bonito material nos dá a natureza nestes meses primaverais.

Maios 2º PRIMARIA CEIP Mestre Pastor Barral

Curtametraxe Valores: Tolerancia e Empatía

Emocionante curtametraxe que a todos nos vén moi ben ter presente na nosa realidade escolar, e fóra dela.

Conto colaborativo desde casa: A Nube Gris

Traballo rematado!  As nenas e nenos desta clase regalannos unha lectura colaborativa dun conto que trata sobre a preocupación, unha emoción que nos vén a todos de cando en vez, e máis nos tempos que corren. Só podo regalarlles un aplauso virtual. 👏👏👏👏👏👏👏👏👏👏👏👏👏👏👏👏👏👏

Traballos das crianzas

Aquí vos deixo algunhas das actividades aquí propostas e que os nenos foron realizando. Hai moitas ben creativas e ocurrentes.

Traballos do BLOG

Xogos tradicionais galegos para tempos de recollida

Achégame o inspirador docente Paco Veiga, unha eminencia do tema en cuestión, este enlace onde podemos atopar excelentes ideas para xogar coas crianzas na casa. Non deixedes de botarlle un ollo, pois actualízase cada día. Gracias de novo, Paco.

XOGOS TRADICIONAIS EN TEMPOS DE RECOLLIDA

Reto 3:Cociñando ideas...

Imos cun novo reto. Neste caso imos facer uso dun dos espazos máis necesarios nun fogar. Falamos da cociña. Ese lugar onde se preparan eses saborosos pratos que nos encantan. Esta vez convídovos a que compartades as delicias que seguro facedes cos vosos maiores. De boa tinta sei que temos na clase uns auténticos/as chefs de primeira.

Que temos que facer? Ademais de compartir con nós o apetitoso resultado, temos que dar tres datos:

1º. Nome do prato.
2º. Ingredientes.
3º. Breve explicación do que se fixo.

Por favor, a axuda de adultos é necesaria e agradecida. Que mellor que preparar algo para comer cos propios comensais!!!

*A fotografía subímola do xeito habitual, cubrindo o formulario da parte inferior desta publicación. Os datos da receita poderédelos facer imprimindo esta ficha ou facéndoa cada un ao seu gusto. As decoracións estrambóticas son benvidas.

Día Internacional do Libro 2020

Aquí vos deixo un pequeno vídeo para fomentar a lectura nun día tan especial como o de hoxe. 

Feliz Día Internacional do Libro.

Cóntame un conto!

Como imos comezar unha das semanas máis fermosas do curso xa que celebramos o 23 de abril, o Día Internacional do Libro, que mellor homenaxe lle podemos facer ao longo desta semana que "darlle marcha ás neuronas" e estimular a nosa creatividade narrativa con cousas de casa. Xa que estamos todos e todas confinados nas nosas casas, imos elixir un obxecto inanimado da nosa casa e darlle vida. Imos contar a súa historia: de onde veu, como chegou, como se usa... Lembra presentárnolo dándolle un nome, pois xa vai deixar de ser unha cousa para chegar a ser un ser animado.

Aquí che vai un exemplo:

"Estaba na tenda coas miñas irmás de árbore e de repente colléronme e leváronme ao almacén, vestíronme un plástico esponxoso e metéronme nun camión. Baixáronme nun portal, subíronme polo ascensor, desvestíronme do plástico e puxéronme no centro do salón. Ao día seguinte puxéronme un manteliño vermello, vasos, pratos, bandexas de canapés... e sentáronse a cear. Cuando remataron, puxéronse a coller unhas uvas e a comelas coas badaladas dun reloxo na tele. Ao final brindaron con champaña. Ao día seguinte quitáronme o mantel e todos os adornos, logo colo´caronme a un lado do salón.
Aí sigo, agardando que sexa Noitevella outra vez.

Poñamos as mans a traballar!

Aquí vos deixo outro vídeo do meu admirado Sergei Urban e a súa canle "The Dad Lab", nesta ocasión con ideas sinxelas para levar a cabo na casa coa rapazada con un material que todos e todas temos na casa: o papel.
Nada mellor que unha tarde de domingo facendo cousas entretidas e que nos axuden a traballar a a psicomotricidade fina.



 

Hoxe toca conto!

Non hai nada mellor que ler(ou ver e escoitar) un conto para relaxarnos un pouco e para reflexionar. nesta ocasión aquí vos deixo a lectura dun conto moi bonito de Julián Fuentes no que poderemos reflexionar sobre a importancia das cousas.

Reto 2: Escritura creativa a través do "Limerick"

Imos con un pouco de escritura creativa. Recurrindo ás ideas do marabilloso e imprescindible Gianni Rodari, convídovos a que creemos uns "Limericks". Un "Limerick" é un tipo de nonsense(sensentido), unha composición poética de cinco versos nos que se conta unha historia de xeito breve. No 1º verso preséntase ao protagonista. No 2º, unha característica ou calidade especial do protagonista. No 3º e 4º, cóntasenos unha acción que o implica. E no 5º, unha especie de epíteto final, a poder ser que sexa un pouco extravagante.

Déixovos un exemplo:

   " Era un vello do charqueiro
     de xorne trivial e choqueiro
     que sentado no cabaz
     cantaba e cantaba cantigas ás ras,
     o didáctivo vello do charqueiro."


Co "Limerick" ten que ir o debuxo que represente o que nel se conta.
Por suposto, que esta actividade requiere dunha axuda de adultos, pero seguro que nos sorprende a creatividade e saleiro dos vosos pequechos e pequechas.

Experimento xeitoso para facer na casa

Facendo uso dos experimentos de Sergei Urban cos seu fillos na web The Dad Lab, aquí vos deixo un que é moi factible para facer na casa e que me chamou especialmente a atención. Consiste en facer un burato nunha superficie de auga e xabón sen que esta se estrague.

 

 Necesitamos:
-Un fío con un nó
-Un arame para facer a base
-Auga
-Xabón concentrado(tipo Fairy, Mistol ou similares)

Tamén existe a versión en libro (moi recomendable). A miña é a edición inglesa, pero xa existe a edición en castelán.